Queres traballar en Arela?
En Arela queremos sumar a unha persoa ao noso equipo. Necesitamos incorporar un perfil júnior, que conte con algunha experiencia e con moitas ganas de traballar e aprender xuntas.
Que facemos nós?
Desenvolvemos proxectos de márketing sostible. Iso significa dúas cousas. Que deseñamos proxectos á medida dos obxectivos e dos recursos de cada cliente, de xeito que se poidan soster no tempo e ir medrando pouco a pouco. E que nos gustan as empresas, as entidades, as persoas coas que compartimos valores, que respectan e coidan os lugares nos que traballan e a xente que as acompaña.
Que farías ti?
Necesitamos unha persoa que nos axude na xestión de redes sociais e na creación de contidos (para blogs, páxinas web, tendas en liña, redes sociais, email márketing…). Cando leves un tempo traballando con nós, tamén nos gustaría implicarte na xestión de proxectos e que colabores no deseño das estratexias que creamos.
Que buscamos?
- Usuaria/o activa de redes sociais. É importante que coñezas o funcionamento das redes sociais principais e que teñas a capacidade de adaptarte e aprender nun entorno que cambia todos os días. Se xestionas algunha comunidade en redes sociais, indícao no teu currículo ou no correo que nos envíes.
- Escribes ben en galego e castelán. Ter a capacidade de crear textos para o mundo online e escribir ben nos dous idiomas é fundamental. Se escribes nun blog ou creaches contidos para algunha web, cóntanolo.
- Capacidade de crear contido multimedia. Non é imprescindible pero é un punto máis ao teu favor que che guste a creación de contidos de foto e vídeo.
- Es activa/o, con iniciativa propia e ganas de compartir ideas/solucións co equipo.
- Es quen de participar en diferentes proxectos a un tempo (somos un equipo pequeno).
- Compartes certa sensibilidade ou interese por proxectos vinculados ao territorio, desenvolvemento rural, turismo sostible, comercio electrónico e iniciativas con impacto social.
Desenvolvemos o noso traballo desde Os Ancares e O Ribeiro. Traballamos en remoto e desde sitios “remotos”, polo que ti tamén podes vivir onde queiras. Tan só un ou dous días ao mes terías que traballar desde Os Ancares ou O Ribeiro.
Pensamos que no noso blog e web hai información suficiente para que nos coñezas e decidas se Arela podería ser un bo proxecto para ti. Se esta oferta encaixa co teu perfil e che apetece traballar con nós, envíanos o teu currículo a ola@arela.gal.
NOTA: Máis importante que o currículo é que nos contes por que che gustaría unirte ao noso equipo.
Estamos desexando lerte!